Ek Din Achanak Part 43
Usne padha ki paas ke circus se ek bhalu chut kar bhag gaya hai aur wo usi jungle ki taraf bhaga hai jiske paas inka college tha. Ek baat jo usne aur note ki wo ye thi ki wo bhalu poori tarah trained tha aur sudh shakahari tha. Bas fir kyat ha Ravi ke khurafati dimaag mein ek idea aaya aur usne apne idea ke bare mein Diya ko bata diya. Usne Diya ko hidayat bhi di ki iske bare mein kisi ko kuch na bataye.
Plan ke mutabik Diya Monika se milti hai aur use batati hai ki jungle mein videshon se kai sunder pakshi aaye huye hain. Agar wo unki tasveer kheenche to uske liye aur uske assignments ke liye bahut upyogi hoga. Monika ye sunkar khus ho jaati hai aur apna digital camera lekar photos kheenchne ke liye chal deti hai.
Monika Diya ko bhi apne saath aane ke liye kehti hai lekin Diya ye kehkar mana kar deti hai ki jungle mein kai jungle jaanwar ghoomte rehte hain isliye mujhe dar lagta hai. Tum bhi hosiyaar rehna.
Monika hasti hai aur kehti hai main apni safety khud kar sakti hoon. Main kai forest mein jaakar photography ki hai.
Diya kehti hai “Mera kaam tha tumhe agaah karna. Aage tum jaano yaa tumhara kaam”. Monika uski baat sunkar thoda soch mein padh jaati hai lekin phir khud par bharosa karke chal deti hai aur wo bhi akele. Kabhi kabhi ati atamvishwaas bhi aadmi ko maar deta hai.
Monika jungle mein pahunch jaati hai aur wahan jaanwaron ko dhoondhne lagti hai. Ab jaanwar wahan honge to milenge na.
Halanki kai birds use aisi mili jo England mein nahin thi to usne fatafat unki kai photos kheench li. Iske baad wo thoda aur aage badh gayi. Halanki shaam ka samay tha aur jungle ke andar halka halka andhera chane laga tha lekin use pata tha ki isi samay kai pakshi ya pashu apne apne ghar wapas aate hain to wo uski tasveer kheench sakti hai.
Idhar Ravi bhi apni yojna ke mutabik kaam hota dekh kar bahut khus tha. Jaise hi Monika jungle ke itne andar aa gayi ki ab uski cheekh bahar tak na sunai de sake to Ravi ne bhalu ki jo costume wo apne saath laya tha pehan li aur peeche se achanak Monika par hamla bol diya. Monika is hamle se ghabra gayi aur camera aur baaki ka samaan uske haathon se gir pada.
Bhalu bane Ravi ne turant use utha liya aur jaanbooj kar use ulat palat kar dekhne laga. Monika ka dar ke maare bura haal tha. Uska poora sharer paseene se tar batar tha. Uski bolti band ho gayi thi aur wo cheekhne jaa rahi thi ki tabhi usne dekha ki bhalu use ungli se chup hone ka ishara kar raha hai to chup ho gayi.
Achanak wo dekhkar hairan ho gayi ki bhalu ne camera aise thaam rakha hai jaise use photo kheenchna aata hai aur wo use pose dene ko keh raha ho. Hairani aur dar ke mile jule bhaav ko apne chehre par liye wo wahin but bani khadi rehti hai ki tabhi use bhalu ki gurrahat sunai deti hai (Ye gurrahat Ravi ne record karke apni jeb mein rakh li thi).
Uska dhyaan tutta hai aur wo dar ke maare dubara cheekh padti hai lekin tabhi use ishara dikhai deta hai bhalu ki taraf se pose banane ka to wo dimaag lagati hai ki do teen aise hi pose dekar is bhalu ko khush kar deti hoon taaki ye busy ho jaaye aur main mauka dekhkar uske peeche se jaakar bhaag jaungi.
Lekin pehle isse kaise peecha chudaya jaaye ye sochna padega. Aur Monika ne bhalu ke saamne kai tarah se pose dene shuru kar diye. Kabhi sar ke upar haath rakh kar, kabhi kamar ko pakad ke, kabhi thodi par haath rakhe huye aur kabhi tarah tarah ke chehre bana kar. Monika ko bilkul bhi khabar nahin thi ki saara photo shoot ho raha hai aur wo bhi kahin aur se.
Ye kaam Diya kar rahi thi aur uska haste haste bura haal tha. Thodi der baad jab photoshoot khatam huya to ek baar aur Ravi ne gurrahat wala tape chalaya aur camera ko patak kar andar jhadiyon mein gum ho gaya. Monika ke to jaise jaan mein jaan aayi aur wo apna samaan utha kar turant bhag chali.
Ravi ko subah hi ye pata chal gaya tha ki asli bhalu ko circus wale der raat dhoondh kar apne saath le gaye the isliye usne ye plan banaya tha.
Ravi Diya ke paas aaya aur usse wo camera lekar use dhulwane chal pada. Idhar Monika ne ghar aakar chain ki saans li aur wapas dubara us jungle mein jaane se tauba kar li. Jaise taise karke usne raat gujari aur so gayi. Raat bhar use bhalu ke bure bure darawane sapne aa rahe the jiski wajah se baar baar uski neend toot jaati lekin aankhen kab tak jaagti. Palak jhapakne lagi aur wo gehri neend mein gayi.
Subah huyi aur wo college pahunchi. College pahunch kar usne dekha ki har koi uski taraf dekh kar hans raha hai. Use kuch samajh nahin aa raha tha. Usne apne kapdon ko dekha ki kahin se fate yaa maile to nahin hai. Phir apna chehra dekha lekin wahan bhi aisi koi baat nahin thi. Tabhi uski najar college ki deewaron par padi to uske hosh hi ud gaye. Aankhen fati ki fati reh gayi kyunki har deewar par uske kal bhalu ko diye gaye pose ki tasveeren chipki huyi thi.
Uske kuch bhi samajh nahin aa raha tha ki tabhi use Ravi aur Diya ke hasne ki awaaz aayi jo use hi dekh kar hans rahe the. Ravi uske paas aaya aur bola ki kal pose to saare ho gaye lekin dance reh gaya. Kya aaj phir jungle aayogi taaki wo bhi shoot ho sake aur Ravi yeh kehkar phir hasne laga. Saara college asli baat jaankar Monika ka majak uda raha tha. Monika bhi saara maamla samajh gayi aur usne Tit for Tat karne ki sochi.
To be continued....
Saba
13-Jan-2022 08:51 PM
Wow
Reply
Kareem
13-Jan-2022 08:25 PM
Great
Reply
Ayra S
23-Dec-2021 04:05 PM
💙
Reply