دلبر لکھیں
دلبر لکھیں جو تو نے وہ دشنام چوم لوں
پہلے مگر میں خط پہ ترا نام چوم لوں
رنگ و جمال و مرتبے میں فاصلے سہی
اسود سمجھ کے چہرۂ اصنام چوم لوں
یاں ہم فراق تیری درازی سے مر گئے
تو کہتی ہے میں زلفِ سیہ فام چوم لوں؟
خواہش معاف کرنا ہوس تو نہیں مگر
اتنے حسین ہو کہ سب اندام چوم لوں
اُکتا گیا شراب سے ، کچھ اور چاہیے
ہو اذن تو یہ عارضِ گلفام چوم لوں؟
اس کی خرامِ ناز کا حق بنتا ہے یہی
قدموں کو اپنی آنکھوں سے ہر گام چوم لوں
ہونٹوں تلک رسائی میسر نہیں ولے
میٹھا ہو منہ جو تلخئی دشنام چوم
لوں
کہتے ہیں میرا بندِ قبا کھولنا ذرا
پہلے سمجھ کے جامۂ احرام چوم لوں
زاہد کو چھیڑنے کا بہت من کرے ہے آج
اس کے حضور کہہ کے تجھے رام چوم لوں
__________قطعہ_________
تسلیم کوئی چارہ گرِ دل نہیں مگر
اب سر جھکا کے قسمتِ ناکام چوم لوں
تشنہ لبوں کے منہ بھی نہ دورِ سبو لگا
ساغر سمجھ کے گردشِ ایام چوم لوں
__________قطعہ_________
ہنگامِ اختلاطِ غمِ روز گار سے
فرصت نہیں کہ عشق کے آلام چوم لوں
ساغر کو توڑ تاڑ کے ساقی میں رند اب
برقع اٹھا کہ اس میں چھپا جام چوم لوں
Simran Bhagat
17-Aug-2023 10:35 AM
بہت خوبصورت
Reply