आज हे पोरा तिहार
आज हे पोरा तिहार
खेलव फुगड़ी नाचव कूदव
गावव रे ददरिया
आस के अंगना लिप बहार ले
आज हे तिहार पोरा।
आगे गा कइसन जमाना
मनखे मनके नइहे ग ठिकाना
रिश्ता नता नदावत हे
मिलजुरके तिहार ला तैहर मना ले।
हांस ले खिलखिला ले
कर ले मया के ढिढोली
नदिया बइला ला टूरा ह कुदाही
टूरी मन ह बनाही रोटी चीला।
माटी के बइला माटी के खिलोना
सपना के लगाही बिछौना
आस के अंगना लिप बहार ले
आज हे तिहार पोरा।
सुनत हस नगरिहा
आज सजा ले बइला ला
लटपट में जीवरा ह बाचिस हे
गा ले तैहर ददरिया ला।
चिरई चिरगुन चिहुंकत हे
शीतल हावे पुरवैया
आरती सजा के, तैहर मना ले
शिव पार्वती ला।
खेलव फुगड़ी नाचव कूदव
गावव रे ददरिया
आस के अंगना लिप बहार ले
आज हे तिहार पोरा।
नूतन लाल साहू
