Ek Din Achanak Part 8

Huya ye ki school ki taraf se ek picnic ka ayojan kiya gaya jisme sab bachhon se bhi kuch paise jama karaye gaye as a registration fees. Ravi ne socha ye achha mauka hai ki wo Pawan ko bahar le jaaye saath mein. Naya mahaul, naya vatavaran hoga uske liye to uska dil halka ho jayega. Isliye usne apne aur Pawan ke paise bhi jama kara diye bagair Pawan ko bataye. Jab Pawan ko malum pada is baare mein to usne mana kiya lekin Ravi ki jid kea aage wo haar gaya aur use manna pada.

Idhar Riya ko pata chala ki Pawan aur Ravi bhi picnic mein jaa rahe hain to usne socha ki ye achha mauka hai ki Pawan se maafi maang le aur sab gile-shikwe door kar lein. Ye sochte sochte uska dil mein ek anjaani khushi bhar gayi lekin saath mein ek dar bhi tha ki agar kahin Pawan ne mana kar diya aur use thukra diya to wo kya karegi. Lekin yun ghut ghut kar jeene se to achha hi hai ki baat saaf ho jaye.

Picnic Sunday ke din rakhi gayi thi aur venue tha Lotus Temple, Delhi. Sabhi bachhon ko bata diya gaya tha ki wo 7 baje tak har halat mein school mein pahunch jaye jahan se 7:30 baje bus chal degi . Khane-peene ka saara intezam school ki taraf se tha. Jin jin bachon ne jana tha wo to excitement ki wajah se 6:30 se hi aane shuru ho gaye the aur lagbhag 7:15 tak saare bachhe bhi aa gaye the.

Pawan aur Ravi bhi kuch snacks aur Water bottle ek chote se bag mein lekar wahan pahunch chuke the aur Riya bhi ek doosri classmate ke saath wahan aa chuki thi. Pawan aur Riya ne ek doosre ko dekha lekin kuch keh na sake. Dono ko kai mauke mile akele mein baat karne ke liye lekin Pawan ne koi pehal nahin ki. Ab ek mard ka aham kai baar uske dil par hawi ho jaata hai, bhale hi is baat ke liye use baad mein pachtana pade.

Wohi haal Pawan ka bhi tha. Pawan bahut kuch kehna chahta tha Riya se, bahut baatein baaki thi lekin chah kar bhi uske muh se koi bol na fute. Riya ne aakhir thak haar kar khud usse baat karne ki sochi. Usne socha ki picnic spot par pahunch kar wo akele mein mauka dekhkar Pawan se baat karegi aur usse maafi maang legi.

Bus apne time se 10 min late apne gantavya sthan ki taraf prasthan karne lagi. Bus mein sab bachon ne shor machana shuru kar diya.

Koi gaane ga raha tha, koi baatein kar raha tha. Kul milakar bahut shor tha bus mein. Bus mein Pawan aur Riya agal bagal ki seat par baithe the. Dono hi chori chori ek dusre ko dekh kar tasalli kar rahe the. Riya ne baat bhi karni chahi lekin is shor mein koi baat bhi nahin ho sakegi aisa usne socha aur irada filhaal taal diya.

Bus kuch ghanton mein hi Lotus Temple pahunch gayi aur wahin ek kamre mein sabka saaman rakh diya gaya jiska school ne pehle se hi intezam kar rakha tha. Sab bachhon ne Lotus Temple ghumna shuru kar diya. Aur apne Pawan, Ravi and Riya bhi nikal pade Lotus Temple ki sair karne ke liye.

Pawan ka kahin man nahin lag raha tha lekin Ravi ki khushi ke liye wo uske saath saath ghum raha tha. Dono ne talab dekhne shuru kiye jo Lotus Temple mein andar bane huye the. Wahan aur bhi kai log khade the. Kuch usme jhank rahe the kyunki sabko usme apna pratibimb dikh raha tha. Kuch usme sikke (coins) dal rahe the jise dekh kar chote chote bachhe kilkariyan mar rahe the. Ek kautuhal sa the bachhon mein sikke ko pani mein doobte huye dekhna. Kaise sikka dheere dheere pani mein gehrai mein doobta jaata hai aur aakhir mein tali mein jaa kar takrata hai.

Idhar Riya bhi akele akele udaas man se yahan se wahan ghoom rahi thi. Lekin uska man bhi nahin lag raha tha akele akele. Pawan ke paas to fir bhi Ravi tha jiske saath wo apne sukh dukh baant sakta tha lekin Riya kisse kahe. Class mein baaki ladkiyon se bhi uski koi khaas dosti nahin thi jiske saath wo baat kar sake. Sab apni saheliyan ke saath masti kar rahi thi. Riya ka man nahin laga aur wo Lotus Temple ke bahar aa gayi park mein. Park mein aane ke baad wo ek bench par baith gayi aur baith kar aage ke baare mein sochne lagi.

Park mein kai manchale ladke bhi the jinhone dekha ki Riya akeli baithi huyi hai. Pehle to unhone jayza liya ki uske saath to koi nahin hai lekin jab tasalli ho gayi to teen ladke uske saamne jaa kar khade ho gaye. Riya in ajnabi ladkon ko dekhkar kuch ghabra gayi aur usne poocha ki tum log kaun ho aur tumhe kya chahiye. Ladke sharati andaaza mein bole ki tum. Riya ka dar ke maare bura haal tha. Wo aisi jagah baithi thi jahan se Lotus Temple ka main gate seedha dikhai nahin de raha tha isliye koi bhi use dekh nahin pa raha tha.

Wo teeno uske saath chedkaani karne lage aur wo madad ke liye chillane lagi. Lekin ladkon ne uska mooh band kar diya aur usko ghaseette huye door le gaye. Lekin ghaseetne mein ladkon ka haath muh par se hat gaya aur Riya ki cheekh nikal gayi jo aas paas ke logon ke logon ne sun li aur sab udhar ki taraf bhage. Ladkon ne auron ko dekhte hi Riya ko chod diya aur bhaag khade huye. Pawan aur Ravi ne bhi Riya ki cheekh sun li thi to wo bhi daudkar park mein aa gaye. Wahan Riya ka dar ke maare bura haal tha aur Pawan ko dekhte hi daudkar uske gale lag gayi aur phoot phoot kar rone lagi.

Pawan bhi uski peeth ko sehlate huye use dilasa deta raha aur wahin park mein baith gaya. Ravi ne dekha ki dono mein sulah ho gayi hai yaa sulah karne ki koshish kar rahe hain to usne dono ko akela chodna theek samjha. Baaki log bhi dheere dheere wahan se chale gaye. Riya kuch der tak to roti rahi aur fir chup hokar Pawan ki aankhon mein dekhte huye kaha “Tum mujhse khafa ho na kyunki maine tumhe thappad maara tha. Shayad bhagwan usi ki saja dene wala tha mujhe. Please mujhe maaf kar do. I LOVE YOU”.

Pawan ko apne kaano par jaise vishwaas hi nahin hua. Usne kas ke Riya ko apne gale se lagate huye kaha “Tum nahin jaanti us din ke baad se mein kitna tadpa hun tumhare liye. Tum paas nahin thi to kisi kaam mein, padhai mein, kuch bhi karne mein man nahin lagta tha. Tumne aisa kyun kiya tha Riya”. Tab Riya ne use saari baat batayi jiski wajah se usne Pawan ko thappad maara tha (Wajah aap logon ko main pehle hi bata chuka hun). Pawan ne ye sab sunkar kaha “Riya meri hi galti thi, main tumhare pyaar mein kuch jyada hi excite ho gaya tha jiski wajah se sabke saamne tumhara haath pakad baitha. Please mujhe maaf kar do bhale hi ek do thappad aur maar lo”. Ye sab kehte huye Pawan muskuraya to Riya ke chere par bhi muskurahat cha gayi.

Riya ne kaha “Pawan mujhe chod kar mat jaana. Main tumse bahut pyaar karti hoon. Ab mujhe duniya ki koi fikar nahin hai”. Pawan ne Riya ko I LOVE YOU bola aur itna kehkar dono ek deep French kiss mein doob gaye.

Sab bachhon ko hall mein bulaya gaya tha jahan ek holy speech di jaane wali thi jiske liye Ravi, Pawan aur Riya dono ko bulane chala gaya. Wahan un dono ko premalap mein leen dekh kar uske chehre par bhi khushi cha gayi Pawan ke liye aur dono ko bulane ke liye wo park mein chala gaya. Wahan se dono ko bulaya usne aur hall mein kuch time speech huyi aur khane-peene ke baad sab wapas school mein aa gaye. Wahan se sab apne apne ghar wapas aa gaye. Pawan aur Riya bhi ek dusre ko dekhte huye flying kiss karke apne apne ghar wapas aa gaye. Dono ki aankhen aaj bhi nam thi lekin usme judai ka ehsaas nahin milne ki khushi jhalakti thi.

Pyaar ke upar do line yaad aa rahi hai. Aasha hai aap logon ko pasand aaye

 Phool se poocha kisi ne -Tune di khushboo sabko par badle mein tujhe kya mila!

Phool ne kaha-Dene ke badle lena to vyapar hai. Jo dekar bhi kuch na maange wohi to sachha pyaar hai

Iske baad to dono kai baar saath saath ghumne gaye, film dekhne gaye, restaurant gaye. Dono ka pyaar parvan chadta gaya. Ravi ki bhi Riya se achhi dosti ho gayi thi aur ab do se teen dost ho gaye the. Lekin ek baat aur achhi huyi ki Pawan ne ab padhai par dhyaan dena shuru kar diya tha jisme Ravi ke banaye huye notes Pawan aur Riya dono ke bahut kaam aaye. Pyaar ki kasmein bhi khayi gayi Riya aur Pawan ke beech aur aage ke bhavisya ke liye sapne bhi dekhe jaane lage. Padhai mein dhyaan lagana shuru kar diya teeno ne. Teeno ne 12th achhe numbers se paas kar li aur college mein admission ke liye apni kamar kas li.

End of Episode 2