Ek Din Achanak Part 23
Achanak Jawed Bhai hadbada kar uth gaye. Unke haanfti aur ukhadti saans, chehre par paseene ki boonde, thartharata shareer is baat ki gawahi de rahe the ki wo ek bahut bura sapna dekh rahe the. Unhone ghadi dekhi to subah ke 4 baje the.
“Itna bhayanak sapna. Ye sach nahin ho sakta. Main aur us chasmish Jassi se pyaar. Kabhi nahin. Aur use kiss karne ke naam se hi mujhe ulti aa rahi hai. Ye Jay ne mera dimaag kharab kar diya hai. Ye sirf sapna hi to hai.”
“Lekin subah ka sapna aksar sach ho jaata hai. Jaise Baat Ek Raat ki mein Padmini ke sapne sach ho jaate hain. Agar ye bhi such ho gaya to”
"Aisa kabhi nahin hoga. Is Jay ne kis musibat mein fansa diya yaar.
Ek to agle mahine se waise hi poore zone ke cricket match hone wale hain. Uski tension kya kam thi jo ek nayi musibat mere gale pad rahi hai. Khair jo hoga dekha jayega. Allah madad kar apne bachhon ki"
Kya Jawed Bhai ka sapna sach hoga. Kya mulakat aise hi hogi ya koi aur roop legi. Mulakat hogi bhi ya nahin. Kya jiske liye itna sab ho raha hai wo Sonali unhen mil payegi ya nahin.
Jawed fir wapas so gaya kyunki abhi to sirf 4 baje the. Milne to 9 baje jaana tha lekin kuch thakaan aur kuch sapne ki tension ki wajah se. Neend use bahut gehri aayi. Baad mein jab uski aankh khuli to 11 baj gaye the. Wo to apne sar par haath rakh kar baith gaya ki Jassi ne to mujhe kahin ka nahin chora. Maine aaj tak koi kaam taala nahin hai aur ye pehla kaam Jassi ki wajah se tal gaya. Ab to wo institute se nikal gayi hogi. Ab Jay ko kya jawab dunga.
Keh dunga ki aaj aayi nahin. Lekin ye to jhoot hoga. Kya karun, kya na karun kuch samajh nahin aa raha.
Jawed Bhai fresh hokar seedha Jay ke ghar pahunch gaye. Wahan Jay ke kamre mein pahunchne ki hi der thi ki Jay ne unse puchna shuru kar diya. Jawed Bhai ne nirash swar mein sab bata diya lekin apne sapne wali baat nahin batayi. Jay ne kaha “Koi baat nahin.
Jyada tension mat lijiye aap. Agar meri kismet mein Sonali ka saath likha hoga to use mujhse koi juda nahin kar payega.” Pata kal laga lenge. Kal main bhi aapke saath chalunga.
Jawed ko jaise himmat mil gayi ki ab Jay uske saath jayega to uska moral support bana rahega. Thodi der idhar udhar ki baat karne ke baad Jawed apne ghar aa gaya. Ghar aakar usne aaram kiya lekin aaj ka din use bhari pad raha tha bitana. Reh reh kar use ye khyaal aa raha tha ki kahin sapna sach na ho jaye. Kal Jassi se mulakat hogi. Kya sochegi wo uske baare mein. Kaise uska saamna karega. Kya bolega, kya puchega. Aise kai sawal Jawed ke dimaag mein ghoom rahe the. Kisi kaam mein Jawed ka man nahin lag raha tha. Bas idhar udhar ki baatein karta raha ki tabhi unhen khyaal aaya ki ek baar aur Manish ke through jaankari le le. Kya pata sulah ho gayi ho to baat ban jaye.
Jawed ne turant Manish ko phone kiya aur use sab baatein batayi. Manish ye sunte hi khush ho gaya ki use fir se bahana mil gaya Jassi ki behan se baat karne ka. Lekin turant doosra khyaal aaya ki is baar pehle saamne wale ko bolne ka mauka dega. Kahin is baar bhi Jassi ne phone utha liya to lene ke dene pad jayenge. Pehle ek baa raise hi koi baar baar pareshan kar raha tha unke ghar par to Jassi ne apne papa se kehkar police complaint karwa di thi. Bahut maara tha police walon ne us ladke ko.
Manish ne darte darte phone milaya lekin uski kismat meharbaan nikli kyunki is baar phone Jassi ki behan ne uthaya. Manish ka dil to khushi se jhoom utha. Kuch pyaar bhari baatein karne ke baad Manish ne apna asli maksad batate huye poocha “Tum dono ki sulah ho gayi kya”
“Haan ho to gayi hai. Ab didi mujhse baat karne lagi hai”
“To tumne Sonali ke ghar ka pata poocha”
“Sorry wo to main bhool gayi. Abhi to didi market gayi hai. Raat ko unse pooch kar tumhe phone par bata dungi”
“To iska matlab tum mujhe raat mein phone karogi”
“Main raat mein puchungi lekin bataungi kal subah”
“Subah thoda jaldi bata dena pls koi 8 baje tak”
“Kyun itni jaldi kya hai”
“Hai na, kya tum mera itna sa kaam bhi nahin kar sakti”
“Theek hai, subah 8 baje bata dungi. Ab khus”
“Thoda khus hoon. Jyada khus tab hounga jab ek kiss de dogi”
“Kutte ki dum 12 saal nalki mein rakho tab bhi seedhi nahin hoti”
“haha Jo bhi samjho. Ek kiss de do na pls”
Iske baad Jassi ki behan ne use ek kiss di aur kuch pyaar bhari baatein karne ke baad phone rakh diya.
Manish ne Jawed ko phone milaya to Jawed ne phone uthate hi poocha ki kya raha.
Manish ne kaha “Abhi kuch pata nahin chala hai lekin”
Jawed ne poora suna hi nahin tha ki mobile ki battery low hone se phone kat gaya. Is samay light bhi nahin thi ki charge karke dubara baat kare. Lekin unhen bas ye sunai diya tha ki “Abhi kuch pata nahin chala hai” aur apne aapko mansik taur par tayyar karne lage kal ki mulakat ke liye.
Raat huyi aur Jawed chain ki neend so gaya kyunki is baar wo akele nahin the Jay bhi unke saath jaane wala tha. Subah huyi aur Jay tayyar hokar Jawed ke ghar pahunch gaya. Jawed bhi tayyar hokar saath mein nikal pada. Dono institute pahunche to dekha saamne se Jassi chali aa rahi hai. Timing dono ki badhiya thi ki unhen bilkul wait nahin karna pada. Jassi ko dekhte hi Jawed ka chehra aisa ho gaya jaise usne koi aisi cheez dekh li ho jo use nahin dekhni chahiye.
Jassi as usual ek dheele dhaale salwar suit mein thi. Aankhon par bada sa chasma, danto par taar, chehra jhuka huya aur haath mein books, balon mein tel aise dala huya tha jaise ki wo tel se nahakar aayi ho matlab bal chipchipe the, pairon mein hawai chappal, chehre par koi raunak nahin. Jassi ne Jawed ka reaction dekh liya tha jisse use ek jhatka sa laga ki jise wo itna matured samajhti thi aur like karti thi wo bhi auron jaisa nikla. Khair koi bhi usse pyaar to kya use dekhna bhi pasand nahin karta siway uske gharwalon ke.
Jassi jaise hi paas pahunchi to Jay aur Jawed dono turant uske paas pahunch gaye. Jawed to uski taraf dekhna bhi pasand nahin kar raha tha. Shayad sapne ki wajah se ya shayad use Jassi ka chehra pasand nahin tha. Aakhirkar jab Jawed ne nahin poocha to Jay hi bol pada “Sohni, tumse ek baat puchni thi”
“Kya”
“Mujhe Sonali ka pata chahiye”
Jassi ne man hi man socha ki ye chakkar kya hai. Pehle meri apni behan ne pooch pooch kar mera dimag kharab kar diya tha aura b ye dono bhi. Khair mujhe kya. Jassi ne Sonali ke ghar ka pata de diya aur ye bhi bata diya ki do din baad uski shaadi hai.
Jay ke to hosh hi ud gaye ye sunte lekin Jawed ne use sambhal liya. Jay ne Jassi ko thanks bola aur wapas apne ghar ke liye chal diya lekin jaate jaate Jawed ki andekhi Jassi ko ghayal kar gayi ki jis ek insaan ko usne apna maana tha, jise wo samajhti thi ki husn ka pujari nahin hai, jo shareer se nahin man se logon ko pehchanta hai, wo insaan bhi sirf chehre ke peeche hi paagal hai. Jassi ka dil toot gaya aur usne than liya ki ek din sab uski ek jhalak pane ke liye tarsenge aur wo kisi ko koi lift nahin degi.
Idhar Jassi ki behan ka bhi Manish ko phone subah hi aa gaya tha lekin Manish batana bhool gaya. Jab yaad aaya to usne phone milaya Jawed ko aur sab baatein batayi. Jawed gusse mein aa gaya aur kaha “Saale jab sab pata chal gaya hai tab bata raha hai. Ab to humne pata kar liya hai. Tu kisi kaam ka nahin hai. Ab phone rakh” Manish ne socha ki aaj ye Jawed ko kya ho gaya hai. Kaisi ukhdi ukhdi baatein kar raha hai.
Jay aur Jawed dono Jay ke ghar pahunche aur aage ke baare mein sochne lage ki aage kya kiya jaye. To ye faisla liya gaya ki jis din shaadi hogi aur jab wo akeli hogi kamre mein to use bhaga kar le aayenge aur yahan se door ek gaon mein Jay ke relatives ke yahan le jayenge. Bas dono Sonali ko bhagane ki planning mein jut gaye.
Aaj Sonali ki shaadi ka din hai. Poora ghar saja huya hai. Gali mein bhi Kaleen bicha huya hai door tak. Saara ghar logon ki chahal pahal se bhara huya hai. Charon taraf khushiyon bhara sama chaya huya hai. Halwai subah se lage huye the tarah tarah ke pakwaan banana mein. Jab kaam ke liye bhaag daud kar rahe the. Isi tarah bhaag daud mein sham ho gayi aur Sonali beauty parlour se tayyar hokar apne kamre mein aa gayi. Baarat kisi bhi time pahuchne wali thi.
Yahi time tha jab Jay and party ko apni tayyari ko amal mein lana tha.
To be continued....
Kareem
13-Jan-2022 08:33 PM
💖
Reply
Swati chourasia
12-Oct-2021 07:33 PM
Very nice 👌
Reply
Shalini Sharma
30-Sep-2021 07:15 PM
Nice
Reply