Tausif Raza Razvi Official

Add To collaction

24-Jan-2023 نظم -

کِردار ہے ایسا تِرا ، ہر کوئی ہے شیدا تِرا ، جس سے بیاں ہو مرتبہ ، لاؤں کہاں سے وہ زباں
خواجۂ خواجگاں
شاہِ ہندوستاں

جو بھی گستاخ اُس کے ولی کا ہُوا
کَرتا اعلانِ جنگ اُس سے ہے کبریا
ہے یہ قسمت مِری ، پائی نسبت تِری
تجھ پہ قرباں ہے جاں ، خواجۂ خواجگاں

جو تِرا با وفا ، رب کا وہ با وفا
جو ہے تیری رضا ، وہ ہے رب کی رضا
بات تیری بڑی ، تو عطائے نبی
کوئی تجھ سا کہاں خواجۂ خواجگاں

خاک ہستی مِری ، تو جناں کی کلی
میں گدا بِن گدا ، تو سخی بن سخی
دیں ہے تیری عطا ، تو معیں دین کا
تجھ پہ قرباں جہاں ، خواجۂ خواجگاں

موسوی رنگ تیری اداؤں میں ہے
جلوۂ ابرہیمی دعاؤں میں ہے
تو حبیبِ نبی ، تو عطا غوث کی
تو ہے شاہِ زماں ، خواجۂ خواجگاں

تیرے دَم سے بہار آئی ہے ہند میں
رحمتِ کبریا چھائی ہے ہند میں
تو ہے ہند الولی ، ہے تجھی سے خوشی
شاہِ ہندوستاں ، خواجۂ خواجگاں

ہے عیاں رخ سے نورِ حبیبِ خدا
واقعی بات تیری ہے سب سے جدا
دیکھیں جلوے تِرے ، غیر کلمہ پڑھیں
ہو کے سب یک زباں ، خواجۂ خواجگاں

جِس گھڑی جوش پر ہو کَرم کی ندی
تو بَناتا ہے جیپال کو بھی ولی
اے مِرے راہبر ، تجھ کو سب ہے خبر
کیا کہوں داستاں ، خواجۂ خواجگاں

اب بھی تازہ ہے گُل تیرے کردار کا
ذکر ہے ہر طرف جس کی مہکار کا
تجھ پہ جو مر گیا ، وہ امر ہو گیا
حامئِ بے کساں ، خواجۂ خواجگاں

آقا! تو داعیِ دینِ شاہِ اُمم
تیرا دیوانہ ہے کُل عَرَب کُل عَجَم
ہے مِرا پِیر تو ، میری تقدیر تو
صاحبِ کارواں ، خواجۂ خواجگاں

بادشاہی ہے خود تیرے گھر کی کنیز
زندگی کا مِلا ہے تجھی سے تمیز
تیرے گھر سے مِلا ہے زمانے کو نور
اُس پہ قرباں جناں ، خواجۂ خواجگاں

تونے کر کے کرم جن کو مسند ہے دی
ہو گئے آج ظالم وہ ، یا مرشدی!
جیسے ہو کوئی سایہ برا ، یوں ہوئے
سارے ہی حکمراں، خواجۂ خواجگاں

تو ہے شاہوں کا بھی شاہ ، میں ہوں فقیر
مجھ سے لاکھوں کروڑوں ہیں ، تو بے نظیر
بَنتا تھا جو اَنا ، اُس کی ٹوٹی اَنا
تیرا ہمسر کہاں، خواجۂ خواجگاں

تیری گلیوں میں اترے ہیں ماہ و نجوم
آج اجمیر میں آقا تیری ہے دھوم
جان تو ، شان تو ، وَجہِ ایمان تو
راحتِ عاشقاں ، خواجۂ خواجگاں

تیرے کوچے میں ہے رنگ جنت نما
اس قدر ہے تِرا پیارا روضہ سَجا
پیارا گنبد تِرا دودھیا دودھیا
نور کا گلستاں ، خواجۂ خواجگاں

آقا! سحرا ہوں میں اور سمندر ہے تو
ناتواں میں ہوں لیکن تونگر ہے تو
شان تیری الگ ، میں تو سگ کا بھی سگ
میں صِفر ، تو جہاں ، خواجۂ خواجگاں

شاہِ بطحا کی امت کا سب سے بڑا
 ہے گنہگار روضے پہ تیرے کھڑا
ہے نکما یہ توصیفؔ ، ہو اِک نظر
کر دے اب کامراں ، خواجۂ خواجگاں

مثلِ سحر تلوا تِرا ، کَیا خوب ہے جلوہ تِرا
تن میں تِرے بُوئے نبی
ہے روشنی تجھ سے یہاں
خواجۂ خواجگاں ، شاہِ ہندوستاں

ہے راہِ حق، رستہ تِرا ، بے مثل ہے کاسہ تِرا، دِل کا سُکوں روضہ تِرا
ابنِ شہ کون ومکاں، خواجۂ خواجگاں

•°•°•°•
✍️از۔ توصیف رضا رضوی باتھ اصلی سیتا مڑھی بہار انڈیا
+91 9594346926

   17
1 Comments
avatar

Simran Bhagat

25-Jan-2023 10:40 PM

Bahut khoob

Reply