محشر
کہیں محشر میں بھی وہ مائلِ پروا نہ ہو جائے
بھری محفل میں چشمِ آرزو رسوا نہ ہو جائے
چلی ہیں میری آہیں عرش کا پایہ ہلانے کو
کہیں برہم نظامِ عالم بالا نہ ہو جائے
فریبِ حسن صورت آفریں کا جال پھیلا ہے
کہیں اے شوقِ نظارہ تجھے دھوکا نہ ہو جائے
چلا تو ہے دلِ دیدار جو دیدار کی دھن میں
فروغِ حسنِ جاناں حسن کا پروانہ ہو جائے
شرر افشانیوں سے آہ عالم سوز کی ڈر ہے
کہیں برباد حسن و عشق کی دنیا نہ ہو جائے
تجلیِ جمال روئے عالم تاب کے آگے
کہیں یہ دیدہِ مشتاق نابینا نہ ہو جائے
سمجھتے ہو وہ بیدم کیوں نھیں آتے عیادت کو
انہیں ڈر ہے مریضِ غم کہیں اچھا نہ ہو جائے
