میر و غالب کی پیروی کیا ہے

میر و غالب کی پیروی کیا ہے 

ذکرِ جاناں ہے ، شاعری کیا ہے 

رفت و آمد سے آپ کی سمجھے

موت کیا شے ہے زندگی کیا ہے

مسکراہٹ ہے ایک بچے کی 

اور بتلائیے خوشی کیا ہے 

آنکھ کے سامنے چراغ فضول 

ہونٹ کے سامنے کلی کیا ہے 

دیکھتا ہوں میں اس کے دیکھے کو 

سوچتا ہوں وہ سوچتی کیا ہے 

ایک تصویر بھیج دیتا ہوں 

جب کوئی پوچھے دلکشی کیا ہے  

تیری خواہش تو ہو نہیں سکتی

پھر یہ سینے میں آگ سی کیا ہے 

جانتا ہوں نہ دیں گے بوسہِ لب

مانگ لینے میں حرج بھی کیا ہے 

گر قمر ٹھیک ہے تو ٹھیک ہے سب

گر غلط ہے تو ٹھیک ہی کیا ہے

قمر آسی